Gjatë ditës së sotme moti në vendin tonë do të vijojë të jetë nën ndikimin e masave ajrore të paqëndrueshme, ku skaji Verior dhe Verilindor paraqiten me vranësira të dendura dhe shira të izoluar e të pakët, ku nuk përjashtohet mundësia edhe e ministuhive afatshkurtra të breshrit.
Ndërsa mbrëmja dhe nata do të sjellin largim gradual të vranësirave duke bërë që moti i kthjellët të jetë dominues në zonat bregdetare dhe të ulëta por mbeten të dukshme vranësirat në zonat përgjatë kufirit lindor.
Sipas MeteoAlb, temperaturat e ajrit rriten lehtë gjatë mëngjesit por edhe gjatë mesditës duke shënuar vlerat minimale dhe maksimale 9°C deri në 27°C. Era do fryjë mesatare në tokë dhe det me shpejtësi deri 35 km/h, nga drejtimi Veriperëndimor ndërsa në det të hapur krijohet dallgëzim 3 ballë.
