Institucionet shtetërore vazhdojnë që të shpenzojnë miliona lekë pa asnjë kontroll. Kësaj here është Drejtoria e Shërbimeve Qeveritare, e cila ka hapur një tender në datën 15 shkurt 2022, për blerjen e pajisjeve të kancelarisë dhe tonera për vitin 2022. Ky tender mban numrin e referencës REF-19703-02-15-2022 dhe ka fondin limit prej 2.959.282 lekë të reja, ose rreth 30 milionë lekë të vjetra.
Pra, institucioni në fjalë do të shpenzojë rreth 30 milionë lekë të vjetra për të blerë kancelari ku ndër të tjera përfshihen edhe lapsa, stilolapsa, goma, zarfa, blloqe, dosje. etj. Meqenëse na ka rënë rasti që të shkojmë disa herë nëpër kancelari dhe t’i njohim çmimet që kanë këto produkte, Drejtorisë së Shërbimeve Qeveritare do i mjaftonte edhe më pak lekë që të përmbushte nevojat e saj për stilolapsa. Por si në shumë procedura, edhe këtu vjen era klientelizëm më shumë sesa për të blerë lapsa e goma.
Dhe këtë na e tregon një ankesë e cila ka mbërritur në Komisionin e Prokurimeve Publike, 6 ditë pasi është shpallur tenderi, nga kompania “INTERLOGISTIC Sh.P.K”. Siç duket kompania ka marrë pjesë në garë dhe ka konstatuar që disa kritere të vendosura janë në mënyrë jo të rregullt. Sipas ankesës së “INTERLOGISTIC Sh.P.K”, thuhet se hartuesit e tenderit kanë vendosur që kontrata të zbatohet brenda 5 ditëve, gjë që sipas kompanisë është shumë i shkurtër. Kjo pasi bëhet fjalë për furnizime me sasi e llojeve të ndryshme dhe sipas kompanisë duhen të paktën 30 ditë për të kryer punën që kërkon tenderi.
Mesa duket derjtuesit e institucionit e kanë paracaktuar fituesin se kujt do t’ia japin tenderin dhe kriteret i kanë përshtatur që të dalë fituese kompania e ndonjë miku. Sepse të bësh një tender për blerje stilolapsash me 30 milionë lekë dhe të vësh kritere që të sjellin ankesa në KPP, këtu kemi të bëjmë me procedurë për qëllime personale dhe jo publike.
Gijotina.com
Discussion about this post