Ish-anëtarja e Parlamentit Europian, Doris Pack, njëkohësisht një mbështetëse e hapur e Berishës, ka sulmuar ashpër Yuri Kim pas ndërhyrjes në saj në zgjedhjet elektorale të 6 marsit, duke ndikuar në mënyrë indirekte tek votat e qytetarëve.
Në Twitter, Pack shkruan se Kim po ndërhyn në punët e brendshme të Shqipërisë, dhe se ndihet e turpëruar nga veprimet e saj.
“Znj.ambasadore Kim, nuk ka asnjë ambasador në ndonjë vend demokratik që sillet kështu si ju. Ju po ndërhyni vazhdimisht në punët e brendshme të Shqipërisë. Ju nuk po e nderoni vendin tuaj, SHBA. Ndihem e turpëruar nga ju”, shkruan ajo në Twitter.
Kujtojmë se ditën e djeshme, ambasadorja Yuri Kim iu drejtoi disa pyetjeve kandidatëve për kryetarë që mbështeten nga persona të shpallur si të padëshiruar në SHBA, se çfarë mund t’iu premtojnë votuesve të tyre, sa kohë që drejtohen nga një person i shpallur non-grata. Në media u aludua se kjo ishte një sulm i hapur ndaj Berishës, ndërsa Kim reagoi sërish duke thënë se në Shqipëri janë 4 non grata.
Nuk dihet nëse ambasadorja ka informacione se të tjerë kandidatët për kryetarë po ndikohen nga këta non-grata, pasi duhet thënë se vazhdimisht ka pasur akuza nga opozita se Vangjush Dako, një tjetër non grata nga SHBA, fshihet pas kandidaturës së Emirjana Sakos në Durrës.
Discussion about this post