PD nxjerr konkluzionet nga puna e komisionit hetimor të inceneratorëve

Me anë të një postimi në Facebook, Partia Demokratike thotë se çdo seancë në Komisionin Hetimor për Inceneratorët, shpaloset organizimi dhe zbatimi i aferës korruptive. PD shkruan se kjo aferë ka shkaktuar një dëm prej 430 mln eurosh taksapaguesve shqiptarë. Gjithashtu selia blu ka renditur edhe disa çështje që sipas tyre dëshmojnë korrupsionin lidhur me inceneratorët.

“Çdo seancë e Komisionit Hetimor për aferën e inceneratorëve po shpalos përpara qytetarëve se si korrupsioni i përhapur në çdo nivel të qeverisjes ka shkaktuar një dëm prej 430 milionë eurosh familjeve shqiptare. Tashmë është e qartë për të gjithë se organizmi dhe zbatimi i kësaj afere kriminale, nuk mund të ndodhte pa mbështetjen dhe miratimin e Edi Ramës. Ai është koka e korrupsionit të qeverisë” – shkruhet në postimin e PD-së.

Partia Demokratike gjithashtu ka nxjerr edhe 8 konkluzione nga puna e Komisionit Hetimor, të cilat janë:

Sako, tender me “negocim-pa shpallje”, me operator të vetëm, pa garë, për 10 milionë euro për Inceneratorin e Tiranës. Ndërsa 15 milionë euro shtesë transporti;

Ka shtuar sasinë e mbetjeve të Durrësit duke fryre faturën financiare nga 38.146 ton në vit, në 80.000 ton në vit;

Inceneratori i Tiranës kontratë edhe për 30 vite. Çdo ditë 30 mijë euro dëm në ditë, 900 mijë euro në muaj shtesë, 10 milionë euro në vit shtesë;

Ministria e Financave nën drejtimin e Canit refuzoi projektin: Nuk ka studim fizibiliteti, vlerësim financiar, procedure me “negocim-pa shpallje” në kundërshti me ligjin;

Ahmetaj e miraton kontratën e kundërshtuar nga Cani;

Ahmetaj lidhje të hershme me Mirel Mërtirin. Ka udhëtuar nga 2012-2019, 12 herë me pronarët e inceneratorëve;

460 milionë lekë shtesë nga buxheti i shtetit për kompensimin e një prone në Fier;

Raporti i KLSH: Tokë shtetërore, në emër të Bashkisë Fier, jepet si garanci për kredi.