Nënkryetari i Partisë Demokratike, Enkelejd Alibeaj, iu bëri thirrje qytetarëve të mos votojnë kandidaten e PS Majlinda Angoni në Shkodër, pasi sipas PD komandohet nga Tom Doshi. Nga selia blu, Alibeaj ka deklaruar se më 6 mars shkodranët duhet të zgjedhin Xhemal Bushatin përballë atyre që ai i cilësoi si kandidatët e non gratave.
Ndër të tjera, tha se shkodranët e dinë se Agoni është përcaktuar nga Tom Doshi dhe gjithashtu dinë se kush i merr tenderat, vendet e punës apo dhe kush i zgjedh drejtorët në Shkodër.
“Çdo shqiptar e ka parë se si non grata Tom Doshi, ka përcaktuar kandidaten e PS në Shkodër. Shkodranët e dinë se çfarë ndodh me pushtetin e administruar nga Doshi. Ata e dinë se kush i merr tenderat, vendet e punës, kush i zgjedh drejtorët sot në Shkodër. Shkodranët e dinë se Tom Doshi është njeriu që vendos gjithçka në emër të Edi Ramës. Prandaj shkodranët në 6 mars do të vendosin nëse do ta lënë bashkinë në administrim të Tom Doshit apo do të refuzojnë non gratat. Demokratët në 6 mars do të vendosi nëse do ta kenë bashkinë në administrim të LSI, që ta ketë më pas për pazarin e radhës me Ramën”, shprehet Alibeaj.
Sipas tij, shkodranët më 6 mars do të duhet të zgjedhin nëse do t’i nënshtrohen krimit dhe korrupsionit apo do ta shndërrojnë bashkinë në shërbim të tyre dhe qytetit.
Discussion about this post