Ka përfunduar raundi i dytë i bisedimeve mes Kievit dhe Moskës. Ukraina thotë se bisedimet e paqes nuk kanë përfunduar siç kishte shpresuar – por raundi i tretë i planifikuar së shpejti. Të dyja palët kanë rënë dakord për korridoret humanitare për civilët.
“Ne kemi diskutuar tërësisht tre pika – ushtarake, ndërkombëtare dhe humanitare, dhe e treta është një çështje e një rregullimi politik të ardhshëm të konfliktit. Të dy pozicionet janë të qarta dhe të shkruara. Arritëm të biem dakord për disa prej tyre, por gjëja kryesore për të cilën arritëm një marrëveshje sot ishte çështja e shpëtimit të civilëve që u gjendën në një zonë përplasjeje ushtarake. Ministritë ruse dhe ukrainase të mbrojtjes ranë dakord për sigurimin e korridoreve humanitare për civilët dhe për një armëpushim të mundshëm të përkohshëm në zonat ku po ndodh evakuimi”, tha Medinsky për mediat.
Bisedimet zgjatën dy orë e gjysmë.
Ndërkohë, një negociator ukrainas tha të enjten se bisedimet nuk dhanë asnjë rezultat që i nevojitej Ukrainës, por ai tha se ekziston një “zgjidhje vetëm për organizimin e korridoreve humanitare”.
“Rundi i dytë i negociatave ka përfunduar. Fatkeqësisht, rezultatet që i duhen Ukrainës nuk janë arritur ende. Ekziston një zgjidhje vetëm për organizimin e korridoreve humanitare,” tha zyrtari i lartë ukrainas Mykhailo Podolyak në një postim në Twitter.
Agjencia e lajmeve Reuters raporton se raundi tjetër i bisedimeve do të zhvillohet në fillim të javës së ardhshme.
Presidenti ukrainas, Volodymyr Zelensky, tha në një intervistë për CNN se ishte i gatshëm për një dialog të drejtpërdrejtë me atë rus, Vladimir Putin.
“Ejani të flasim për këtë, është e nevojshme të ndalet lufta”, tha ai.
“Uluni me mua. Vetëm jo 30 metra larg si me presidentin francez Emmanuel Macron,” shtoi ai.
Ai iu referua takimit të Putin me Macron një muaj më parë, ku ishin ulur në një tryezë 30 metra larg njeri- tjetrit.
Qëllimi minimal i Kievit është të krijojë korridore humanitare – rrugë për civilët për t’i shpëtuar zonave të goditura nga konflikti, sipas negociatorit ukrainas Davyd Arakhamia, i cili më herët postoi një përditësim të shkurtër në Facebook, para helikopterit me të cilin u nis drejt Bjellorusisë.
Ndërkohë, Rusia sipas ministrit të Jashtëm Sergei Lavrov ka tre kërkesa të qarta:
Ukraina duhet të “çmilitarizohet” dhe “denazizohet” (të bëhet neutrale)
Krimea – gadishulli jugor i Ukrainës i aneksuar nga Moska në 2014 – të njihet nga Kievi si pjesë e Rusisë
Dy rajone separatiste në Ukrainën lindore – Republika Popullore e Donetskut dhe Republika Popullore e Luhanskut – të njihen zyrtarisht.
Discussion about this post