Kupa e Anglisë është kthyer në një prej aktiviteteve të preferuara të Sauthemptonit, i cili ka bërë mjaft mirë në vitet e fundit në këtë aktivitet duke iu afruar edhe fazave finale të tij. Por në këtë edicion, rrugëtimi i shkëlqyer i Armando Brojës dhe shokëve të tij, ka një pengesë shumë të madhe në fazën çerekfinale.
Një ditë pas ndeshjes ku eliminuan Uest Hem nga Kupa FA, me gol dhe penallti të fituar nga sulmuesi shqiptar, është hedhur edhe shorti i çerekfinaleve dhe ai nuk ka qenë i lehtë për Sauthempton, pasi përballë ka vënë Mançester Sitin e Pep Guardiolës. Skuadra që po dominon futbollin anglez në këtë edicion, synon që të fitojë edhe kampionatin, edhe Ligën e Kampioneve, edhe Kupën FA.
Ndërkohë, janë evituar përballjet e skuadrave të tjera të mëdha që kanë mbetur në garë, pasi Liverpuli do të ndeshet me fituesen e çiftit Notingam Forest-Hadërsfilld, ndërsa Çelsi do të përballet me Midëllsbrou.
Discussion about this post