Yuri Kim, thirrje kandidatëve: Siguroni votime pa blerje votash

Ambasadorja e SHBA në Tiranë, Yuri Kim ka reaguar për zgjedhjet e pjesshme lokale, që po zhvillon ditën e sotme në gjashtë bashki të vendit.

Me anë të një postimi në Twitter, ambasadorja thekson se ndërkombëtarët po vëzhgojnë procesin. Kim i bën thirrje zyrtarëve shqiptarë të sigurojnë që votuesit të mund të shprehin lirisht vullnetin e tyre, pa asnjë trysni, blerje votash ose pengesa të tjera

“Stafi i Ambasadës së SHBA po vëzhgon votimin në të gjashtë bashkitë. Kam kënaqësinë të jem në #Durrës. Është veçanërisht e mrekullueshme të shohësh kaq shumë të rinj aktivë sot, qofshin votues, komisionerë zgjedhorë apo vëzhgues. Shpresoj që të gjithë qytetarët ta ushtrojnë të drejtën e tyre të votës. Është e rëndësishme që zyrtarët të sigurojnë që votuesit të mund të shprehin lirisht vullnetin e tyre, pa asnjë trysni, blerje votash ose pengesa të tjera”, shkruan ambasadorja Kim.