Ish-ushtarë dhe vullnetarë të guximshëm britanikë kanë shkuar në Ukrainë për të luftuar kundër forcave ruse. Sipas “Daily Mail”, janë me dhjetëra ush-ushtarakë britanikë dhe luftëtarë, që i janë drejtuar Ukrainës pas apelit të Presidentit Volodymyr Zelensky për t’i ndihmuar. Mes atyre që i janë bashkuar luftës, është edhe 25-vjeçari Tomas, nga Londra, i cili pas disa negociatash ka pranuar të flasë në telefon me gazetarët e “Daily Mail”, duke thënë se “Kam bërë katër vjet në Ushtrinë Britanike dhe tani jam larguar për t’u bashkuar me ukrainasit, pasi ata po kërkonin burra. Nuk hezitova. Unë kam përvojë të mirë, kryesisht në ruajtjen e paqes, por gjëja kryesore është që kam trajnime dhe njohuri mjekësore, gjë që nevojitet në këtë situatë.
Djemtë këtu janë shumë të mirë dhe po marrin trajnim të pakonkurrueshëm nga njerëz të përgatitur, britanikë e amerikanë të ish-Forcave Speciale. Ata kanë aftësi të ndryshme dhe po ndajnë njohuritë e tyre, gjë që është e mrekullueshme për ata djem që po i bashkohen luftës, por nuk kanë përvojë ushtarake. Unë thjesht dua të ndihmoj popullin ukrainas në luftë kundër Rusisë. Nuk mund të rrish dhe të shikosh gra e fëmijë të bombardohen pa mëshirë”, ka thënë ushtari britanik.
Më tej, ai iu drejtua me një këshillë atyre që tundoheshin dhe udhëtonin drejt Ukrainës për të luftuar “vetëm për emocionet e tij”, duke ju thënë se “Këshilla ime për ta është që të qëndrojnë në shtëpi dhe të bëjnë punë humanitare në Britani. Ju mund të ndihmoni në mënyra të tjera, nuk ka kuptim të vini këtu dhe ndoshta të vriteni. Lufta këtu është e vërtetë, rusët kanë armë dhe janë mjaft të përgatitur për të qëlluar e vrarë”.
Luftës i është bashkuar dhe 22-vjeçari James, nga Mancesteri, i cili ishte një magazinier, që kishte humbur punën muajin e kaluar. Ai ka pranuar se nuk ka përvojë ushtarake, por që ka ndjerë një “detyrim për të ndihmuar ukrainasit”.
Discussion about this post