Deputeti i Partisë Demokratike, Ferdinand Xhaferaj ka reaguar pas mbledhjes së grupit Parlamentar që u zhvillua në selinë blu, ku në një qëndrim zyrtar shkruan se mbrëmë i ka kërkuar dorëheqjen Lulzim Bashës.
Xhaferraj shprehet në Facebook se refuzon të pranojë që Basha nuk ka pësuar asnjë humbje, nisur nga rezultati i dobët në zgjedhjet e 6 marsit, ku sipas tij u pa se kreu demokrat nuk ka as mbështetje në bazë. Ndër të tjera, Xhaferaj shkruan se grup parlamentar ka kapacitetin për të dalë mbi Bashën dhe Berishën, duket sjellë një lidership të ri në PD.
“Mbrëmë, gjatë mbledhjes së Grupit Parlamentar, kam kërkuar dorëheqjen e Lulzim Bashes nga posti i Kryetarit të Partisë Demokratike. Alternativa që PD paraqet nën lidershipin e tij qartazi nuk është e pëlqyer as nga baza e partisë, as nga votuesit e djathtë, as nga elektorati gri. Unë refuzoj të pranoj se Lulzim Basha nuk ka humbur asnjë garë. Po njësoj refuzoj të pranoj se PD është e ndarë ndërmjet Bashës dhe Berishës dhe s’ka opsion përtej tyre. Themelet e një opozite të vërtetë, siç e meritojnë demokratë dhe më gjerë, hidhen duke dalë së pari nga kurthi i kultit të individit. Grupi Parlamentar i PD-së e ka kapacitetin dhe mbi të gjitha përgjegjësinë të prodhojë një lidership të ri që të nisë procesin e vështirë por shpresëdhënës të ringritjes së partisë”, shkruan Xhaferraj.
Xhaferraj është një ndër deputetët që i dolën kundër Bashës pas humbjes tronditëse në zgjedhje, ndërsa ky i fundit mbledh sot Kolegjin e Kryetarëve për të gjetur mbështetjen që dhe njerëzit e tij më të afërt nuk po ia japin më.
Discussion about this post