Operatorët e transportit në Tiranë kërkojnë rritje 100% të çmimit të biletës për udhëtarët e linjave të autobusëve publikë. Aktualisht çmimi i biletës të transportit është 40 lekë. Për të përballuar kostot nga rritja e çmimit të naftës ata kërkojnë që çmimi i biletës të arrijë 80 lekë.
Kostandin Foni drejtori i linjës të transportit Kombinat-Kinostudio-Tufinë i kompanisë “Shega Trans” tha për Monitor se rritja e çmimit të biletës kërkohet për shkak të shtrenjtimit të lartë të naftës. “Ne kemi bërë kërkesa të vazhdueshme për ndryshime fiskale që do të na mbronin nga shtrenjtimi i çmimit të naftës, por nga institucionet shtetërore deri tani nuk janë marrë në konsideratë. Rritja e çmimit të biletës në 80 lekë konsiderohet një zgjidhje për të vijuar shërbimin, pasi në situatën që gjenden operatorët shumë shpejt do ta kenë të pamundur të furnizohen me naftë. Kompanitë e transportit po e blejnë naftën me çmim 240 lekë/liter nga 145 lekë/litër që ishte më parë. Kostoja e shtuar mujore nga rritja e çmimit te naftës është 8,5 mln lekë”, pohon z. Foni.
Më herët shoqata Kombëtare e Transportit Ndërqytetas i kërkoi kryeministrit Edi Rama dhe ministres të Financave Delina Ibrahimaj heqjen e akcizës të karburanteve dhe TVSH-në. Kompanitë paralajmëruan se në të kundërt do të pezullojnë shërbimin.
Sektori i transportit urban u prek edhe nga kriza e Çovid-19. Numri i pasagjerëve nuk u reduktua 55%, për shkak të frikës nga infektimet dhe emigrimit të popullatës. Bashkia e Tiranës nga 1 janari për të kompensuar reduktimin e numrit të pasagjerëve miratoi fondin me vlerë 1 mln euro për të subvencionuar për 6 muaj 11 operatorët. Kompanitë paralajmëruar që kompensimi është i pamjaftueshëm për të përballuar rritjen e lartë të kostos nga çmimi i naftës
Discussion about this post