Sekretari i Përgjithshëm i Partisë Demokratike, Gazment Bardhi është ndër të paktët deputetët të cilët i kanë qëndruar pranë Lulzim Bashës pas humbjes në zgjedhjet e 6 marsit.
Para hyrjes në Kuvend, Bardhi pranoi para gazetarëve se gjendja e PD është serioze, por sipas tij duke dhënë dorëheqjen nuk iu ikën përgjegjësive, ndërsa shton se secili nga demokratët duhet të reflektojë thellë.
“Gjendja në të cilën ndodhen sot demokratët, duhet të pasojë me një analizë serioze, nuk është një çështje karrige, por analiza duhet të bëhet përmes institucioneve. Në çdo qëndrim timin në politikë kam pasur dy parime, koherencën, dhe vendosjen në vendin e parë të demokratëve. Edhe njëherë unë nuk mendoj dhe nuk besoj se secili prej nesh nuk ka përgjegjësi për situatën ku ndodhet PD, por ama duke ikur, nuk iu ikën përgjegjësive, është gjëja më e thjeshtë që të ikim nga pozicionet që kemi, për ti ikur përgjegjësitë. Demokratët kanë nevojë për përgjegjshmëri në vendimmarrje, nuk mund ta trajtosh PD me dy modele, që në ditë të mira të rrish, dhe në ditë të këqija të ikësh. Nuk ka njerëz të pazëvendësueshëm, por të ikësh, nuk tregon përgjegjësi. Secili demokrat duhet të reflektojë thellë, do të duhet të gjejmë një zgjidhje në interes të demokratëve”, tha Bardhi.
Sipas tij, interesi personal ka zero rëndësi, para interesit të mijëra e mijëra demokratëve, por harron që kryetari që ai mbështet është braktisur nga demokratët prej kohësh, çfarë e faktoi edhe rezultati më 6mars.
Discussion about this post