Kreu i Partisë Demokratike Lulzim Basha ka folur në Parlament në lidhje me çështjen e inceneratorëve, që sipas tij është një nga aferat më të mëdha në vend, ku janë të përfshirë kryeministri dhe disa nga ministrat e kabinetit.
Basha tha nga foltorja e Kuvendit se Komisioni Hetimor i kërkuar nga opozita nxori në dritë fakte të forta në lidhje me kapjen e shtetit, ndërsa tha se opozita është përballur me shumë sulme për komisionin.
“Janë mbledhur tre shokë, ish-anëtari i bandës së Lushnjes Mirel Mërtiri, tjetri Klodian Zoto, dhe parafolësi (Ahmetaj), kanë shkuar të kryeministri, dhe kanë ndërtuar një skemë. I kanë dhënë urdhërin ministrit të parë, ai se zbatoi e hoqën, dhe më pas gjërat shkuan fjollë. Hodhën poshtë rekomandimin e Bankës Botërore, që thoshte se inceneratorët nuk ishin gjëja e duhur. Kanë proceduar në fshehtësi, ku kanë marrë 17 vendime brenda 8 ore, i jepet mundësia një kompanie brenda ditës që të garojë, e më pas të fitojë garën, e pastaj të thuash që këtu nuk ka asgjë jo normale! Dhe ti japësh 20 milionë euro parapagesë, për punë të pabërë, dhe pastaj i njëjti person fiton edhe tenderin e Fierit, dhe më pas emri i tij del edhe në inceneratorin e Tiranës. Denoncimet tona ishin të drejta, na u desh të përballeshim me sulme dhe censurë. Këmbëngulja jonë do të shkojë deri në fund”, tha Basha.
Discussion about this post