Policia e Shtetit ka finalizuar operacionin “Bileta” ku ka rënë në pranga një i ri ndërsa janë shpallur në kërkim dy të tjerë pasi jepnin bileta të cilat ishin të falsifikuara pasi nuk prodhoheshin në shtypshkronjën e letrave me vlerë.
Mësohet se, është arrestuar A. Ç., 25 vjeç, banues në Mushqeta, Tiranë, faturino i linjës së autobusëve Tiranë-Krrabë. Gjithashtu u shpallën në kërkim V. I., 39 vjeç, banues në Baldushk, administratori i linjës së transportit, dhe F. I., 44 vjeç, banues në Tiranë.
Sipas hetimeve, këta persona në bashkëpunim me njëri-tjetrin, falsifikonin dhe hidhnin në treg bileta të linjës së transportit publik Tiranë-Krrabë, të cilat nuk prodhoheshin në Shtypshkronjën e Letrave me Vlerë.
Gjatë kontrollit fizik, A. Ç. iu gjet dhe iu sekuestrua në cilësinë e provës materiale, një sasi e konsiderueshme biletash të dyshuara të falsifikuara. Materialet i kaluan Prokurorisë së Rrethit Gjyqësor Tiranë, për veprime të mëtejshme procedurale, për veprat penale “Falsifikimi i letrave me vlerë”, “Fshehja e të ardhurave”dhe “Mospagimi i taksave dhe tatimeve”.
Discussion about this post