Dhjetëra studentë të Universitetit Bujqësor të Tiranës kanë nisur marshimin e tyre në shenjë proteste kundër rritjes së çmimit te karburantit dhe ushqimeve. Ata kanë bllokuar rrugën te “Rrethrrotullimi i Kamzës” duke kërkuar nga qeveria uljen e taksave, ndërsa janë nisur drejt Bashkisë Tiranë.
“Eja mblidhuni këtu, këtu..”, “Të bashkuar zgjidhim hallet”, “Ulni taksat”-ishin disa nga thirrjet e tyre ‘njëzëri’.
Protestës së studentëve të Universitetit Bujqësor të Tiranës kundër rritjes së çmimeve i janë bashkuar dhe qytetarët, duke fikur makinat në mes të rrugës dhe duke u rënë borive.
Studentët shprehen se nuk kishin kryer asnjë organizim dhe protesta nuk ishte planifikuar, ndërsa janë të vendosur t’i shkojnë deri në fund kundërshtimit të rritjes së çmimeve.
Teksa marshojnë duke i bërë thirrje qeverisë për uljen e taksave, qytetarët duartrokasin dhe brohorasin protestën e tyre.
“Situata mund të përshkallëzojë, ne do i shkojmë deri në fund. Protesta nisi spontanisht, nuk kishim planifikuar apo organizuar gjë”-u shpreh një nga studentët.
Kujtojmë se protestë është mbajtur sot dhe nga studentët e universitetit “Fan Noli” në Korçë të cilët bojkotuan mësimin dhe marshuan përgjatë qytetit duke kërkuar uljen e çmimeve.
Discussion about this post