Policia i kërkon të hapin rrugën, studentët: Protestojmë paqësisht

Policia ka penguar studentët e Universitetit Bujqësor të Tiranës, që të marshojnë përgjatë rrugës së Durrësit. Studentët janë duke iu afruar ministrisë së Arsimit, ku pritet të jetë edhe destinacioni final i këtij marshimi që ka nisur prej më shumë se një orësh.

Madje një polic dëgjohet teksa iu drejtohet studentëve, duke iu lutur që të largohen nga rruga, pasi bllokojnë rrugën e Durrësit.

Ndërkohë, studentët i janë kundërpërgjigjur;
“Protestojmë paqësisht. Hapni rrugën”, thirrën në kor të rinjtë.

Polici: Ju lutem, mos na pengoni
Studentët: Pse nuk na kuptoni ne?

Në një moment studentët iu kërkuan punonjësve të policisë që ti bashkoheshin protestës së tyre, duke iu kujtuar faktin se edhe ata paguajnë taksa dhe çmime të larta.

“A keni edhe ju fëmijë, a i paguani tarifat si ne?”, ishin pyetjet që studentët i bënë punonjësve të policisë, që padyshim nuk morën përgjigje prej tyre.

Studentët bllokuan për disa minuta nënkalimin te Casa Italia, ndërkohë që e kanë përshkruar në këmbë të gjithë aksin rrugor në drejtim të kryeqytetit.

Protestës kundër rritjes së çmimeve për produktet e shportës dhe naftës iu janë bashkuar edhe studentët e Korçës. Studentët e universitetit të Korçës ‘Fan S. Noli’ bojkotuan ditën e sotme mësimin, si shenjë revolte kundër rritjes së çmimeve.

Ata janë shprehur për mediat se kjo do të jetë rezistenca e tyre ndaj rritjes së çmimeve, ndërsa shihen të marshojnë drejt Fakultetit të Bujqësisë, teksa mësimi është pezulluar.

“Ju rrisni çmimet, ne rezistencën, mos të bëhet heshtja jonë gazi i botës”, shprehen studentët e revoltuar.