Deputeti Edmond Spaho, mori dje pjesë në protestën e Korçës kundër rritjes së çmimeve dhe për këtë shkak u procedua penalisht. Ai ka detyrim paraqitje dhe është në hetime, por vetë deputeti ka mohuar se do të paraqitet në polici. Në një intervistë televizive Spaho tha se kjo është një lojë e policisë për të trembur qytetarët, në mënyrë që të mos marrin pjesë në protesta. Spaho u shpreh se ka një vendim të Gjykatës Kushtetuese, që e thotë qartë se e drejta e protestës është themelore, dhe askush nuk ka pse të njoftojë më herët policinë.
“Është e drejta ime dhe e çdo qytetari që të protestoj, nuk do të paraqitem në polici. Këto janë lojëra të policisë, që të trembin qytetarët që të mos marrin pjesë në protestë, nuk kanë për t’ia arritur qëllimet. Edhe ato ndalimet që bëjnë janë të paligjshme, ka një vendim të Gjykatës Kushtetuese, që e thotë qartë se nuk ka nevojë për lajmërim që të protestosh. Qytetarët kanë të drejtë që të protestojnë, apeli është që qeveria ti thërrasë mendjen, dhe të zgjidhë problemet e qytetarëve, nëse nuk i zgjidh protestat do të përshkallëzohen“, u shpreh Spaho. Ai tha se nuk do ti përgjigjej pozitivisht ftesës së policisë, për të shkuar në komisariat, pasi edhe sot do ti bashkohet protestave të qytetarëve
Discussion about this post