Ky është i shumëkërkuari Alfred Mikeli, që prej 4 vitesh vijon të jetë një i arratisur i drejtësisë. Por mosprekja e tij nga prangat, më shumë se çështje fati ka qenë çështje parash të paguara ndaj policisë në mënyrë që për të, ai të ishte i padukshëm. Së paku kështu rezulton se vepruan dy oficerë të operacionale që mbasi zbuluan vendndodhjen e Mikelit kërkuan para me kushtin që mos ta prangosnin.
I kërkuari për trafik droge u lokalizua nga agjentët Viktor Buca dhe Gëzim Luka që pas katër ditëve shërbim raportuan se nuk kishte asnjë gjurmë të tij. Por ndërkohë ata nisën pazaret me të.
45 vjeçari i shumëkërkuar nga policia po kalonte pushimet verore në qytetin e Durrësit pa rënë në sy nga autoritetet. E megjithatë ai ishte pikasur nga informatorët e efektivëve që janë nën hetim.
Të dënuarit me 8 vjet burgim ju kontrollua banesa ku jetonte me qera dhe gjatë negocimit, agjentët i propozuan ta paguante lirinë. SPAK përmend se i shumëkërkuari i është lutur duke ju treguar se kishte mundësi ta paguante direkt vetëm 1500 euro. Por dy të akuzuarit kanë këmbëngulur 10 mijë euro “pasi sipas tyre 5 mijë euro ishin për shefin dhe pesë për ta”.
SPAK u vu në dijeni nga miku i të shumë kërkuarit i cili i huazoi atij shumën që i nevojitej.
Shtetasi që është dëshmitar në hetime përmend se mbas kësaj me një BMV, me targa të paregjistruara, oficerët u larguan drejt Tiranës ku do të merrej 10 mijë euroshi.
Me rëndësi të veçantë konsiderohet edhe dëshmia e bashkëshortes të të kërkuarit që shpjegon se burri i saj u ndalua pasi dolën xhiro dhe dy persona e ndaluan në kohën që ai mbante fëmijën në krahë. Në hetime përmendet dhe marrja në pyetje e zyrtarëve të policisë së Durrësit, mbasi është verifikuar nëse ka patur apo jo plan masash për arrestimin e Mikelit.
Njëri nga policët që del të ketë hapur Timsin gjatë kësaj periudhe pranon që ja kërkuan kolegët si nder, mbasi donin të shikonin kush ishte Alfred Mikeli. Por në fakt ndonëse qytetari Koleci kërkoi që çështja të mos hetohej, pas saj doli një aferë korruptive.
Top Channel
Discussion about this post