Ndonëse përpiqet ta fshehë, vala e protestave që ka nisur prej disa ditësh, e ka shqetësuar shumë qeverinë. Kryeministri Edi Rama në takimin me pensionistët ka ofenduar sërish protestën e qytetarëve duke e konsideruar si “turp kombëtar”.
Gjithashtu, ai gjeti rastin të sulmonte edhe ish-kryeministrin Sali Berisha kur tha se para disa vitesh kur dilje në protestë, vriteshe, referuar protestës së 21 janarit ku katër protestues u vranë, ndërsa në pushtet ishte Berisha.
“Shkruante një profesor i nderuar, Fatos Tarifa, një letër të hapur për mua dhe më qortonte për mungesë durimi ndaj qortimeve të protestuesve dhe për arrogancë ndaj tyre, duke qenë se unë thashë që është turp. Unë e përsëris, ajo protestë është turp kombëtar. Faktet janë aty dhe kujtesa e gjithsecilit e konfirmon atë që them. Nuk ka pasur Shqipëria qeveri më të vëmendshme se sa këto 8 vite, 9 bëhen në shtator. Në këtë vend haje plumbin ballit po të dilje në protestë, por me mua është protestuar sa është dashur. Jo se e jap unë këtë të drejtë, por i kemi dëgjuar me respekt”, tha Rama.
Discussion about this post