Organizata Ndërkombëtare për Migracionin (IOM) bëri me dije se më shumë se 3 milionë njerëz janë larguar nga Ukraina qëkur Rusia ka nisur pushtimin e saj në datën 24 shkurt. Zëdhënësi i IOM-it, Paul Dillon, raportoi në një konferencë të Organizatës së Kombeve të Bashkuara në Gjenevë, se totali është përpiluar nga shifrat e dhëna nga autoritetet kombëtare.
Agjencia e OKB-së për refugjatë, UNHCR, u shpreh se Polonia strehon më shumë se gjysmën e refugjatëve ukrainas, mbi 1.8 milionë.
Zëdhënësi i UNHCR-së, Matthew Saltmarsh, tha se shumica e refugjatëve janë gra dhe fëmijë. Destinacione të tyre janë edhe vendet e tjera fqinje të Ukrainës, si: Rumania, Moldavia dhe Sllovakia. Sipas UNHCR-së gjithashtu, rreth 300,000 refugjatë kanë lëvizur prej atje drejt Evropës Perëndimore.
Kujtojmë se, Rusia ka nisur pushtimin e paprovokuar të Ukrainës më 24 shkurt. Presidenti rus, Vladimir Putin, ka dhënë urdhrin për sulm pasi nuk ka marrë garanci nga NATO-ja se nuk do të zgjerohet më drejt lindjes. Perëndimi e ka dënuar ashpër veprimin rus dhe ka vendosur një sërë sanksionesh të rënda kundër Rusisë.
Discussion about this post