Masakroi familjen shqiptare, 60- vjeçari grek hetohet për vrasjen e dy punëtorëve

Zbardhen fakte të reja për të shkuarën e 60-vjeçarit, autor të vrasjes së katërfishtë të familjes shqiptare në Andravidë.

Sipas mediave greke, autoritetet po përgatiten t’i kërkojnë ndihmë Europolit për vrasjen e dy personave konkretë, një shqiptar dhe një bullgar, të cilët ishin punëtorë sezonalë në zonën e Andravidës.

Punëtorët e tokës ishin grindur në vitin 2019 me autorin dhe brenda dy ditësh janë zhdukur nga zona. Ngjarja ka ndodhur në një kafene në një vendbanim jashtë Andravidës, ku autori i mëvonshëm i vrasjes së katërfishtë ka lëshuar komente raciste për origjinën e tyre si dhe ka nxjerrë armën dhe i ka kërcënuar.

Menjëherë kanë ndërhyrë disa persona të tjerë që ndodheshin në vendngjarje duke e shuar konfliktin. Por, dy ditë më vonë, punëdhënësi i dy burrave u tha banorëve të zonës se bullgari dhe shqiptari nuk ishin paraqitur në punë. Madje, ata dyshohet se janë larguar pa kërkuar as paratë.

60-vjeçari ka marrë rrugën për në burgun e Korydallos pasditen e djeshme, teksa i është caktuar masa e paraburgimit pas kërkimit të faljes, e cila ka zgjatur gati 5 orë.