Ministria e Bujqësisë ka reaguar pas ngordhjes së 500 mijë pulave në Durrës dhe Korçe, ku i kërkon qytetarëve që të mos alarmohen. Përmes një deklarate për mediat, ministria shprehet se nuk kemi të bëjmë me një grip shpendësh. “Ministria e Bujqësisë nëpërmjet Agjencisë Kombëtare të Veterinarisë dhe Mbrojtjes së Bimëve dhe Institutit për Sigurinë Ushqimore dhe Veterinarinë informon opinionin publik se nuk ka asnjë rast të pranisë së influencës aviare (gripi i shpendëve) në Shqipëri deri më tani”, thuhet në deklaratë.
Sipas tyre, nuk ka sëmundje që rrezikojnë konsumatorin apo produktet me origjinë nga shpendët. Ndërsa pretendojnë se rastet e dyshuara janë të lokalizuara në vetëm 2-3 stabilmente në një zonë të vetme, e cila ende po mbahet nën vëzhgim për të mësuar më shumë lidhur me dukurinë. “Pas analizave të kryera në tre data të ndryshme dhe me mbi 60 kampione, rezultatet e marra nga mostrat e dërguara nga Agjencia Kombëtare e Veterinarisë dhe Mbrojtjes së Bimëve drejt laboratorit të certifikuar në Institutin për Sigurinë Ushqimore dhe Veterinarinë përjashtojnë kategorikisht sëmundjen virusale të gripit të shpendëve. Rezultatet e analizimit në laboratorin e referencës konfirmojnë se nuk ka sëmundje që rrezikojnë konsumatorin apo produktet ushqimore me origjinë nga shpendët”, thekson Ministria, ndërsa bën me dije se analizat po vazhdojnë por nuk ka hapësira për panik, pasi gjithçka është nën kontroll.
Discussion about this post