Dikur emri i saj lakohej në media për “tronditjen” që ajo i shkaktonte skenës teksa këndonte, e sot emri i saj ka pushtuar faqet e mediave për shkak të arrestimit për trafikim droge. Një kthesë e jashtëzakonshme.
Prej vitesh Elsa Lila kishte rënë në qetësi dhe askush nuk po fliste më për të, pasi prej vitesh jeta e saj është ndërtuar jashtë dhe ardhjet në Shqipëri kanë qenë përherë e më të rralla. Këngëtarja e ka ruajtur gjithmonë me fanatizëm jetën e saj private.
Zëri magjepsës i skenës shqiptare fitoi në Festivalin e 1996-ës me këngën “Pyes lotin”, ndërkaq teksa ka dalë në skenën e Sanremos me “Valerian” ajo nuk arriti ta prekte fitoren.
Elsa Lila erdhi me statusin e një ylli për të drejtuar Festivalin e RTSH-së dhe kushdo që ia vuri gishtin për ta vënë në skenën e festivalit si prezantuese bëri “bingo”. Elsa nuk u bë kurrë vajza e intervistave, e kopertinave aq më pak e portaleve.
Pavarësisht se ajo ka tentuar ta mbajë jetën e saj larg mediave, disa foto të befasishme me vajzën bënë bujë të madhe. Mirëpo ajo që ka mbetur enigmë për kaq vite ka qenë partneri i saj që asnjëherë nuk i është bërë i ditur identiteti. Sot vajza e saj, Evita është 11 vjeçe.
Rikthimi më i gjatë i Elsës në Shqipëri ishte kur i dha vetes ca ngjyrime politike dhe u shfaq publikisht si përkrahëse e Partisë Socialiste dhe më pas në rolin e një prej trajnerëve të “The Voice of Albania” në Top Channel, që forcoi pozitat e saj si një artiste e lindur.
Hera e fundit që Elsa Lilën e pamë në një skenë shqiptare ishte në 2017-ën, kur u ftua nga Adi Krasta në Festivalin e RTSH-së konkretisht në edicionin e 56-të i tij, ku këndoi një nga kryeveprat e Vivaldit.
Mirëpo emri i saj ka bërë bujë sërish në media në vitin 2018, pasi është bërë pjesë e një problemi në lidhje me të drejtat e autorit, pasi u akuzua se ka kryer një vjedhje.
Kompozitori Genti Lako ka thënë se artistja ka vjedhur këngën “Buzët më ishin tharë”, e cila është produksion i Lakos, i kënduar në formën origjinale nga Eranda Libohova.
“Miqtë e mi, mbas ‘Zonja dhe zotërinj’ që më vodhën në Serbi pa të drejta, ma vodhën dhe këtë këngë. Nuk i kam dhënë leje ta këndojë. Turp që e merr pa leje. As me vdek s’po na lejnë rehat!”- ka shkruar atë kohë kompozitori i famshëm
E ndërsa në Shqipëri, me gjithë ato pak kthime, Elsa Lila ishte ikona e muzikës shqiptare, në Itali vajza nga Shqipëria u harrua shpejt. Pa asnjë llogari në rrjetet sociale do ishte harruar edhe këtu, sikur sot të mos ishim tronditur nga lajmi se Elsa Lila është arrestuar. /Gijotina.com/
Discussion about this post