Kur ende nuk ka asnjë shenjë nga kryedemokrati Lulzim Basha për dhënien e dorëheqjes, deputetja Grida Duma ka deklaruar se kjo situatë nuk duhet të zvarritet më shumë.
Duma tha para gazetarëve në dalje të Kuvendit, se Basha mori kohën qe i nevojitej por nuk është mirë që të zvarritet procesi, ndërsa tha që partia duhet të bashkohet.
“Sa më shumë të zvarritet kjo situatë, aq më shumë agravon ndjesitë. Besoj se do të ketë reflektim dhe zgjidhje. Besoj se ka një solidaritet me kohën që ka kërkuar. Ka njerëz që kanë bashkëpunuar dhe e shohin normale që të presin disa ditë. A ka kuptim të pritet? Të gjitha organet duhet të respektohen, duhet të tregohet kujdes nëse janë organet e votuara. Kemi ardhur në një situatë që duhet të kemi në krye të punëve njerëz që përfaqësojnë votën e organeve të partisë. Nuk është mirë që të zvarritet procesi. Ato që janë lajme në media nuk përfaqësojnë Kolegjin e Kryetarëve. Duhet të kuptojmë një gjë. Partia që të jetë e madhe, duhet të ndalemi me këto cic-mice”, tha Duma.
Discussion about this post