Kreu i Partisë Demokratike ditën e sotme ka zhvilluar një takim me demokratët e Njësive n.1, n.2 dhe n. 3 në Tiranë, në kuadër të fushatës që ai po bën për tu zgjedhur sërish kryetar i kësaj force politike.
Basha është shprehur se 13 qershori dita ku do zgjidhet për kreun e PD, të përdoret për të shpalosur vlerat e garës së brendshme, për të dalë të bashkuar dhe për të dhënë një sinjal të fortë se këtë betejë sipas tij do ta vazhdojmë për njerëzit deri në fitore.
Më tej Basha është shprehur se me 25 prill në Shqipëri nuk është kryer thjesht një masakër zgjedhore por ka rënë demokracia.
Sipas tij PD do vazhdojmë të luftojmë më gjithë forcën, deri në rrëzimin e regjimit Rama-Doshi.
Pjese nga fjala e Bashes:
Duke demonstruar kështu para shqiptarëve se përballë ortekut të amoralitetit, të kriminalitetit, të korrupsionit, të harbutërisë, që kurrë nuk do ja toleronim në shtëpinë tonë, askujt. Të anti-vlerave dhe kampioni i tyre, Shqipëria jo vetëm që ka një alternativë, por ka një alternativë të kulluar vlerash që nisin nga brenda familjes tonë.
Dhe ju ftoj ta zhvillojmë këtë me përpikmëri, me vetëdije të plotë se është një nga vlerat kryesore të familjes tonë, por njëkohësisht kjo gare e ka një disavantazh, ajo zhvillohet në kushtet kur kundërshtari politik ka kryer krimin më të madh dhe kur Shqipëria ndodhet në udhëkryq. Siç jemi të vetëdijshëm ne për dëshpërimin që ka kapur shqiptarët, që po kthehet dhe po i le vend zemëratës. Po kështu duhet të jetë i vetëdijshëm edhe kundërshtari jonë politik.
Dy janë konturuar si mekanizmat kryesore që po përdor ai. E para, është një vazhdim i propagandës, të agresionit ndaj Partisë Demokratike përmes ofertave diabolike për bashkëpunim. Bashkëpunim pa vija të kuqe madje, me fletë të bardhë përpara madje. Sigurisht që është një mashtrim, as e para, as e dyta, por e shumta ndër hiletë që tashmë ky kundërshtar djallëzor i ka kthyer në një përditshmëri.
Duke na ftuar për bashkëpunim, në fakt na fton të asgjësohemi si e vetmja forcë që mund të denoncojmë krimin, mund të luftojmë krimin dhe mund të ndërtojmë betejën për të rrëzuar krimin dhe kriminelët. Nëse shkojmë në atë drejtim nuk ka më asnjë shpresë për Shqipërinë dhe shqiptarët, nuk ka më asnjë forcë që t’i kundërvihet. Prandaj për këtë çështje dua të jem i qartë, i prerë, i shkurtër. E para, 25 prilli është një masakër zgjedhore dhe unë si kryetar i Partisë Demokratike me përgjegjësi të plotë kam deklaruar se nuk i njoh dhe nuk e pranoj masakrën zgjedhore të 25 prillit.
Nuk i njoh rezultatet e tjetërsuara dhe vullnetin e tjetërsuar të 25 prillit. Dhe së dyti, se përgjigjja e prerë ndaj ofertës për bashkëpunim pa vija te kuqe dhe fletëve të bardha e të zeza të Edi Ramës është një jo e prerë dhe finale.
