Aksident në Memaliaj – Krahës, plagosen rëndë tre persona

Një aksident i rëndë ka ndodhur në aksin Krahës-Mallakastër, ku si pasojë janë plagosur 3 persona.

Ngjarja ka ndodhur në afërsi të fshatit Krahës, Bashkia Memaliaj ku dy automjete janë përplasur me njëra-tjetrën duke shkaktuar plagosjen e tre personave, dy prej të cilëve në gjendje mjaft të rëndë.

Ka qenë automjeti tip “Mercedez Benz” me drejtues shtetasin A. M., 36 vjeç banues në Përmet i cili është përplasur frontalisht me një tjetër autoveturë tip “Renault” me drejtues shtetasin L. F., 50 vjeç, banues në Mallakastër me një shpejtësi marramendëse.

Menjëherë në vendngjarje kanë shkuar forcat policore dhe ndihma e shpejtë të cilat kanë transportuar për në Spitalin e Gjirokastrës tre të plagosurit gjendja e të cilëve është e rëndë.

Policia po heton për zbardhjen e plotë të rrethanave dhe shkaqeve të aksidentit tragjik.