Tre persona janë arrestuar nga Policia e Lezhës, pasi iu është sekuestruar një sasi prej 40 kilogramësh drogë, e dyshuar kanabis sativa. Mësohet se, në pranga kanë rënë Erdgys Arrazi, Izmir Dervishi dhe Durim Mehmedaj.
Sipas policisë, bazuar në informacionet e marra se disa persona po transportonin lëndë narkotike, me 2 automjete, në rrugën nacionale Shkoder – Lezhë, u organizua operacioni policor i koduar “Zadrima”.
Si rezultat, u bë lokalizimi dhe ndalimi i dy automjeteve. Gjatë kontrollit në automjetin tip “Volkswagen”, me drejtues shtetasin Izmir Dervishin shërbimet e Policisë gjetën dhe sekuestruan në cilësinë e provës materiale 5 thasë plastmasi të mbushur me material bimor të dyshuar lëndë narkotike kanabis, e cila pas peshimit rezultoi 40 kilogramë. Në automjetin tjetër tip “Seat” ndodheshin Durim Mehmedaj dhe Erdgys Arrazi të cilët shoqëronin automjetin ku u gjet lënda narkotike.
Materialet procedurale i kaluan Prokurorisë së Rrethit Gjyqësor Lezhë, për veprime të mëtejshme, për veprën penale ”Prodhimi dhe shitja e narkotikëve”, kryer në bashkëpunim.
Discussion about this post