Pas vendimit të së premtes që dha Gjykata e Tiranës, e cila njohu Komisionin e Rithemelimit si organ drejtues të PD-së, duke legjitimuar dhe Kuvendin e mbajtur në 11 Dhjetor, Ish-kryeministri Sali Berisha vihet sot në lëvizje. Ai do ti rikthehet sot takimeve me demokratët në bazë.
Berisha ka njoftuar përmes një postimi në Facebook se do të ndalet sot në Jug të vendit ku pritet që të ketë takime me demokratët e Tepelenës dhe Përmetit, në kuadër të një turi, që sipas tij do të jetë përbashkues. “E dielë, në ora 11:00 Foltore me qytetarët e Tepelenës, dhe në ora 13:00 me qytetaret e Përmetit. Ftoj të gjithë qytetaret të marrin pjesë! Sb”, shkruan Berisha në postimin e tij në rrjetet sociale.
Pas vendimit të Gjykatës, anëtarët e Komisionit të Rithemelimit, me në krye vetë Berishën, u rikthyen në selinë e PD-së, në ambientet e të cilës zhvilluar dhe mbledhjet e radhës, si dhe mbajtën deklaratë për mediat. Vetë Berisha pati një takim me Gazmend Bardhin dhe Enkelejd Alibeajn, të cilët një nga kushtet për bashkimin kishin moskandidimin e ish-kryeministrit për kreun e partisë, gjë e cila është përjashtuar kategorikisht si mundësi prej tij. Berisha ka thënë se ai do të kandidojë, në respekt të të gjithë atyre demokratëve që i dhanë mbështetje në zgjedhjet e 6 Marsit.
Discussion about this post