I vuri flakën vetes dhe humbi ndjenjat në tualet, detaje nga zjarri në komisariat

Detaje të reja kanë dalë nga zjarri në komisariatin e Kazmës, ku humbi jetën 26-vjeçari Arben Mici dhe u lëndua punonjësi i policisë Hajredin Boja dhe i arrestuari Dilaver Idrizi.

Sipas informacioneve, mësohet se i riu fillimisht i ka vënë zjarrin vetes, e më pas ka marr flakë dysheku ku rrinte 26-vjeçari. Flakët janë shpërndarë shumë shpejt në qeli, ku si pasojë u dëmtua dhe mori djegie në masë 20% dhe 61-vjeçari Idrizi.

Shkak i ndërmarrjes së aktit të rëndë, dyshohet se ka qenë gjendja e rëndë psikologjike e të riut, ku nga dëshmitë e familjarëve mësohet se ai herë pas herë shfaqte shenja depresioni, edhe pse nuk ka një kartelë mjekësore, pasi nuk është kuruar asnjëherë.

Pas ndërmarrjes së këtij akti, burime thonë se i riu ka shkuar me shpejtësi në tualet, ku edhe ka humbur ndjenjat. Për ngjarjen e rëndë me një viktimë dhe 2 të plagosur, në pranga përfunduan dy efektivë policie dhe u proceduan tre të tjerë.