Kryetarja e Komisionit Hetimor për Inceneratorët, Jorida Tabaku ka reaguar pas arrestimeve me urdhër të SPAK të disa zyrtarëve të lidhur me çështjen e inceneratorëve, ndërsa pritet të ekzekutohet masa “arrest me burg” dhe për deputetin e PS, Alqi Bllako.
Në një deklaratë për mediat, Tabaku tha se operacioni i SPAK nuk është i mjaftueshëm duke bërë thirrje që të arrestohen persona me pushtet më të madh referuar Erion Veliaj, Damian Gjiknurit apo dhe Arben Ahmetaj, për të cilët PD ka bërë kallëzim në SPAK.
“Kushdo që ka qenë i interesuar për aferën e inceneratorëve, sot ka pasur një zhvillim të ri, një zhvillim i parë në drejtim të punës së komisionit hetimor, është shpresëdhënës. Nuk është e mjaftueshme. Në gjykimin tonë, sot me lëvizjet dhe ndalimet e incenerataorit të Fierit, ka pasur një hap përpara. Ky hap nuk është i mjaftueshëm. Pas një pune 4 mujore të Komisionit Hetimor, pas 11 kallëzimeve të dorëzuara në SPAK, pas një raporti prej 120 faqësh me 112 fakte që tregojnë lidhjen në aferën prej 430 milionë eurove ku janë përfshirë, Edi Rama, Damian Gjiknuri, Arben Ahmetaj, SPAK ka reaguar duke arrestuar disa zyrtarë duke përsëritur akuzat ndaj ish-Ministrit Lefter Koka. Nuk është e mjaftueshme. Presim që SPAK të tregojë guxim dhe të reagojë ndaj njerëzve me pushtet. Presim që SPAK të tejkalojë përtej pushtetit politik dhe të bëjë detyrën për të cilin e kemi votuar. Në njoftimin që mora nga SPAKJ. Janë çuar ashtu siç kemi kërkuar, janë arrestuar disa persona, Pëllum Abeshi, Florian Muçaj është zotëria që ka dëshmuar në komisionin hetimor administrator i ALb Petrolit. Arenc Myrtezani, ish-administratori i kompanisë së Fierit. Sabina Cenameri dëshmoi e para, ishte e stresuar dhe Etleva Kndi që ka qenë anëtare e komisionit të Fierit”, tha Tabaku.
Prokuroria e Posaçme Kundër Krimit dhe Korrupsionit, SPAK nisi një seri arrestimesh mëngjesin e sotëm lidhur me dyshimet për korrupsion gjatë lejeve dhe ndërtimit të tre inceneratorëve për trajtimin e mbetjeve urbane në Elbasan, Fier dhe Tiranë.
Discussion about this post