Ditën e nesërme Grupi Parlamentar i Partisë Demokratike ka paralajmëruar se do të zhvillojë mbledhje në selinë blu, ku pjesë e saj do të jenë edhe deputetët e përjashtuar. Gjithashtu pjesë e kësaj mbledhje do të jetë edhe ish-kryeministri Sali Berisha, i cili e ka paralajmëruar në një prononcim për mediat ditën e sotme.
Por për prezencën e Berishës në mbledhje, mesa duket nuk është dakord Gazment Bardhi. Në reagimin e tij, Bardhi shkruan se një parti ku nuk respektohet vullneti, qëndrimi dhe vlerësimi i Grupit Parlamentar është parti personale, por jo demokratike. Sipas tij, deputetët duhet të kenë të drejtë pa asnjë kompleks apo presion të bëjnë vlerësimin e tyre nëse një person i shpallur non grata nga SHBA duhet apo jo të jetë pjesë e grupit.
“Një parti ku nuk respektohet vullneti, qëndrimi dhe vlerësimi i Grupit Parlamentar është parti personale, por jo demokratike. Askush nuk duhet ti imponohet apo injorojë mendimin e Grupit Parlamentar, kjo është përdhosje e dinjitetit të çdo deputeti. Deputetët duhet të kenë të drejtë pa asnjë kompleks apo presion të bëjnë vlerësimin e tyre nëse një person i shpallur non grata nga SHBA duhet apo jo të jetë pjesë e grupit. Deri atëherë askush nuk mund të imponohet. Çdo sjellje tjetër që i imponohet me kokëfortësi grupit parlamentar, pa e pyetur dhe duke e injoruar atë, është e papranueshme dhe jo demokratike” – është shprehur Bardhi.
Situata në selinë blu është ende e paqartë edhe pas dorëheqjes së Lulzim Bashës nga posti i kryetarit të PD. Dorëheqja e tij ka ardhur si një hap pas për t’i shërbyer bashkimit të demokratëve, ndërsa ndryshe ka vepruar Berisha i cili nuk ka bërë asnjë tëehqeje edhe pse i është kërkuar nga grupi parlamentar i PD.
Discussion about this post