Gjenerali amerikan në pension, Wesley Clark ka kujtuar pas 23 viteve luftën në Kosovë dhe ndërhyrjen e NATO-s. Kujtojmë se, një natë pas kapitullimit të Sllobodan Millosheviqit, natën e 12 qershorit të vitit 1999, pjesëtarë të ushtrisë ruse ia kishin mësyrë Aeroportit të Prishtinës në tentimin e tyre për të marrë kontrollin aty. Prezenca e tyre i kapi në befasi trupat e NATO-s, të cilët kishin në plan të zbarkonin në Aeroportin e Prishtinës pas 78 ditësh fushatë të bombardimeve.
Një konfrontim i mundshëm mes forcave aleate të NATO-s dhe atyre ruse kishte rritur shqetësimet deri në atë masë sa që pati të tilla deklarata se aty mund të niste edhe Lufta e Tretë Botërore.
Clark, komandant i forcave të NATO-s në atë kohë, kishte urdhëruar ndaljen e trupave ruse, largimin e tyre nga aeroporti dhe bllokimin e furnizimit. Por, urdhëri ishte shpërfilluar nga Mike Jackson, komandant i KFOR’it. Clark më vonë e ka përshkruar në detaje telefonatën me Jackon në librin e tij “Të bësh luftë moderne”.
23 vjet më pas kur Clark kujton këtë ngjarje, me qetësi thotë se s’do të mund të ndodhte diçka e tillë. Clark për Express ka thënë se frika se mund të shpërthente një Luftë e Tretë aty ishte më shumë një shqetësim i ekzagjeruar i gjeneralit britanik që ishte në stres. “Nuk kishte një rrezik të tillë. Ai ishte thjesht një shqetësim i ekzagjeruar që e shprehu një gjeneral britanik duke qenë nën stres të madh”, ka qenë përgjigjja e Clarku.
Discussion about this post