Sot ish-deputeti Alqi Bllako do të njihet me masën e sigurisë. Një orë para fillimit të seancës drejtori i policisë së Shtetit Gledis Nano ndodhet brenda ambienteve të Prokurorisë së Posaçme.
Prokuroria e Posaçme ka sqaruar se arrestimi i ish-deputetit Alqi Bllako është bërë me 9 orë vonesë nga policia e shtetit, pa sqaruar arsyen e kësaj vonese.
SPAK në një deklaratë thotë se kishte urdhëruar policinë të mbante në vëzhgim deputetin që prej datës 30 mars. Ndërkohë një ditë më pas, në orën 15.54 është përcjellë vendimi i gjykatës për ekzekutim.
Prokuroria thekson se urdhri është ekzekutuar në orën 03.30 të mëngjesit të datës 1 prill nga ana e policisë.
Nga hetimet ka rezultuar se Bllako në kohën që mbante postin e sekretarit të përgjithshëm të Ministrisë së Mjedisit, në bashkëpunim me ish-ministrin Lefter Koka dhe ish-kryetarin e Komisionit të Shpronësimit Pëllumb Abeshi, kanë falsifikuar dokumentin në lidhje me sipërfaqen e tokës ku u ndërtua inceneratori duke i shkaktuar dëm buxhetit të shtetit prej 16 milionë lekësh. Po kështu Bllako dyshohet se ka favorizuar biznesmenin Klodian Zoto për ndërtimin e inceneratorit dhe në këmbim ka përfituar një shumë prej 14 milionë lekësh.
Discussion about this post