Policia e Kosovës ka vënë në pranga 11 persona, pasi hetimet zbuluan se merreshin me transportim mallrash kontrabandë. Hetimet intensive kane filluar në fund të vitit 2021, me autorizim të prokurorisë, ndaj disa të dyshuarve shtetas kosovarë, me dyshim të kryerjes së veprës penale ‘tregti e ndaluar’.
“Sot në regjionin e Ferizajt dhe Mitrovicës së Veriut, është realizuar plani operativ, në kuadër të të cilit Departamenti i Policisë Kufitare dhe Doganën e Kosovës, ka kryer kontroll në katër lokacione, tre në komunën e Shtërpcës dhe një në komunën Mitrovicë Veri, dhe ka ndaluar, kontrolluar katër automjete me të cilat dyshohej se bëhej transport, gjegjësisht tregti e ndaluar dhe kontrabandë” – thuhet në njoftimin e Policisë së Kosovës.
Sipas Policisë, gjate kontrollit në këto katër zona dhe në automjetet e ndaluara është gjetur një sasi e konsiderueshme e mallit komercial, gjëra ushqimore, pije alkoolike, duhan etj., mall i kontrabanduar pa dokumentacion përkatës. Në bashkëpunim me Prokurorinë, malli është konfiskuar nga Dogana e Kosovës dhe janë arrestuar 11 persona kosovarë nën dyshimin se merreshin me tregti të ndaluar dhe janë sekuestruar tri automjete.
Discussion about this post