Një ditë pasi kryeministri Edi Rama vizitoi Gjermaninë dhe kancelarin Olaf Scholz ku në qendër të takimit ka qenë hapja e negociatave për Shqipërinë, ka reaguar ministrja e jashtme gjermane, Annalena Baerbock.
Në një qëndrim zyrtar, ministrja shprehet se Shqipëria dhe Maqedonia e Veriut duhet t’i fillojnë negociatat për anëtarësim në BE në gjysmën e parë të vitit 2022, referuar muajit qershor.
“Vende si Ukraina, si edhe shtetet e tjera, prej kohësh e shohin të ardhmen e tyre në BE. Jo vetëm se nuk duhet t’i dëshpërojmë këto vende, por edhe duhet ta mbajmë premtimin për anëtarësim në Bashkimin Evropian. Kjo vlen edhe për disa vende të Ballkanit Perëndimor, para së gjithash për Shqipërinë dhe Maqedoninë e Veriut dhe pikërisht tani në gjysmën e parë të vitit duhet që përfundimisht t’i fillojmë negociatat me Tiranën dhe Shkupin”, tha Baerbock pas takimit të ministrave të Punëve të Jashtme të BE-së në Luksemburg.
Sipas saj, hapja e negociatave me të dyja vendet prej kohësh është një hap i vonuar, ndërsa shtoi se nga takimit me ministren bullgare të Punëve të Jashtme, Teodora Gençovska, ranë dakord se është e rëndësishme që të fillojnë negociatat për hyrjen e Shqipërisë dhe Maqedonisë së Veriut në BE.
Ajo gjithashtu i dërgoi mesazh edhe autoriteteve serbe se duhet t’i mbështesin politikat e BE-së duke i përfshirë edhe sanksionet ndaj Rusisë, nëse Beogradi dëshiron të bëhet pjesë e Bashkimit Evropian.
Discussion about this post