Kreu i grupit parlamentar të Partisë Demokratike, Enkelejd Alibeaj ka dhënë një deklaratë të shkurtër para fillimit të mbledhjes së grupit parlamentar të Partisë Demokratike, ku hodhi poshtë lajmet se ka marrë mbështetje financiare nga një prej bankierëve më të njohur të Paraguajit.
Nga selia blu, Alibeaj e konsideroi si fantazi të sëmurë lajmin, ndërsa akuzat i konsideroi si trillime dhe shpifje, pasi sipas tij ai është i pashantazhueshëm.
“Duhet të jetë fantazi e sëmurë që përmendet Paraguaji. Është një histori shpifjesh dhe trillimesh. Duhet të mësohen me faktin që mund të ketë politikanë të pakorruptuar dhe të pashantazhueshëm. Jemi në një mbledhje që synon bashkimin e demokratëve dhe e ardhmja e PD-së”, tha Alibeaj.
Alibeaj mund të vihet nën hetim për shkak se akuzohet se ka marrë mbështetje financiare nga një prej bankierëve më të njohur të Paraguajit, Carlos Fernández Valdovinos, njëkohësisht ish-presidenti i Bankës Qendrore të këtij shteti. Diplomati Blas Oddone dhe gazetari vendas Pedro Escobar Medina u bëjnë thirrje institucioneve që të nisin hetimet për Alibeajn, për mbështetjen financiare që ka përfituar nga vendi i tyre. Ata e konsiderojnë Alibeajn, një politikan shqiptar, të korruptuar, ndërsa organet e drejtësisë në vendin tonë nuk kanë reaguar ende.
Discussion about this post