Efektivët e Policisë Kufitare në Morinë të cilët u akuzuan nga SPAK për korrupsion në pikën kufitare dyshohet se kishin shtruar rrugën për kalimin ilegal të armëve dhe municioneve.
Një përgjim i kryer nga SPAK ndaj njërit prej policëve, ka regjistruar një bisedë ku një person i dyshuar si trafikant, pyet efektivin e policisë Reni Dokolli nëse tek kabinat e kontrollit ka skanera që mund t’i zbulonin fishekët ndërsa efektivi i rekomandon që t’i vendosë në çantën e shpinës.
Valon Ahmeti Zvicer: Kam një pyetje…Ti qe je kufitar.
Reni Dokolli Polici: Po vlla më thuaj
Valon Ahmeti Zvicer: Shif jam tu shku Kumanove në Maqedoni, Kam mar ca pluma…A kan skaner ne kabina ata ?…Apo veç po dyshun të ndalin
Reni Dokolli Polici: Tani me dyshu te fusin edhe ne skaner, Mesa di un kanë skaner, Po vec po dyshuan
Valon Ahmeti Zvicer: Dmth ne kabin nuk ka rezik?
Reni Dokolli Polici: Jo, aty jo!
Valon Ahmeti Zvicer: E mir pra në regull.
Sipas Prokurorisë punonjësi i policisë Reni Dokolli ka marrë dijeni për një veprimtari të dyshuar si trafik ndërkombëtar i armëve e municioneve.
Javën e kaluar SPAK urdhëroi arrestimin e 31 efektivave të policisë kufitare të akuzuar për marrje ryshfeti në këmbim të kalimit të paligjshëm të qytetarëve dhe mjeteve në kufirin mes Kosovës dhe Shqipërisë. 17 prej efektivave u lanë në arrest me burg ndërsa 14 të tjerë po ndiqen penalisht në arrest shtëpie.
Discussion about this post