Deputetja e Partisë Demokratike, Flutura Açka ka prezantuar një platformë për një bashkim të demokratëve pas përplasjeve që kanë përfshirë selisë blu prej kohësh tashmë.
Në një postim të gjatë në Facebook, Açka shkruan se bashkimi i partisë mund të nisë vetëm me tërheqjen e Sali Berishës, që ndonëse e quan “luftëtar”, shton se duhet të vetësakrifikohet për të mirën e partisë.
“Por ndryshe nga legjenda, demokratëve koha u kërkon të sakrifikojnë një luftëtar të vjetër. Ose e thënë më mirë, që ky luftëtar i vjetër të vetësakrifikohet për PD-në. Ky është kushti i parë që tërmeti që kemi pësuar t’i mbyllë plagët, dhe kjo është ora historike e PD-së. Ajo kërkon jo vetëm tërheqjen e Sali Berishës, por edhe shmangien pa bujë të një shpure rrotull tij, që për fat të keq u kujtojnë shqiptarëve vitin 97, vjedhjet me vrimat e naftës e minierave, makinat qindra mijëra euro me të cilat enden rrugëve dhe të gjitha abuzimet për të cilat nuk ka shqiptar që i voton më. Ata nuk kanë më çfarë t’u thonë demokratëve e për çfarë shqiptarët t’i besojnë më”, shkruan Açka.
Deputetja demokrate shkruan se pas dorëheqjes së Berishës, duhet që palët të pranojnë që janë palë dhe të vendosin ngritjen e Këshillit të Bashkimit të Partisë Demokratike i përbërë nga anëtarë të zgjedhur me mirëkuptimin e të dyja palëve dhe jo më shumë se 10-15 vetë.
Discussion about this post