Igli Tare ka mohuar kategorikisht akuzat e ngritur së fundi ndaj tij dhe vëllait të tij, për përfshirjen në shoqërinë e basteve “Top Bast”.
Këto akuza burojnë nga një artikull i botuar nga “La Repubblica”, pas investigimit të emisionit “Report” në Rai 3, me titullin: “Futbolli, klanet dhe biznesi: hijet shqiptare të Tares së Lazios’’.
Së fundmi në mediat italiane është publikuar edhe reagimi i Igli Tares nëpërmjet avokatëve të tij që i ka mandatuar për çdo veprim juridik në mënyrë që të mos i cënohet figura.
KOMUNIKATA E PLOTË E LËSHUAR NËPËRMJET AVOKATIT:
“Igli Tare nuk ka absolutisht lidhje me kompaninë shqiptare të basteve TOP BAST, në lidhje me të cilën, ashtu si edhe vëllai i tij Genti, nuk ka interes të drejtpërdrejtë ose indirekt. Teza e mbështetur nga gazetari dhe e atribuar prej tij në dokumentet hetimore, sipas së cilës “në fakt, kompania u përket vëllezërve Genti dhe Igli Tare”, është thjesht e rreme”.
