Pasi tentuan të rrëmbenin ministrin e shëndetësisë dhe të shkatërronin objektet e energjisë, kanë rëndë në pranga katër ekstremista të djathtë në Gjermani. Të dyshuarit janë nga grupi Vereinte Patrioten (Patriotët e Bashkuar), i cili është kundër kufizimeve të vendit për shkak të Covid-19 dhe që shpresonin të përmbysnin demokracinë gjermane duke krijuar kushtet për një luftë civile.
Bastisjet e policisë çuan në sekuestrimin e 8,900 euro para të gatshme, valutë të huaj me vlerë më shumë se 10,000 euro, shufra ari, monedha argjendi, municione dhe rreth dy duzina armë, përfshirë një kallashnikov. Një nga objektivat e synuar të rrëmbimit të grupit ishte Karl Lauterbach, ministri i shëndetësisë.
“E gjithë kjo tregon se protestat e koronavirusit jo vetëm që janë bërë më radikale, por se tani bëhet fjalë për më shumë se koronavirus; se këtu ka një përpjekje për të destabilizuar shtetin. Kjo është një pakicë e vogël në shoqërinë tonë, por shumë e rrezikshme. Kjo nuk do të ndikojë në punën time”, u tha Lauterbach, 59 vjeç, gazetarëve gjatë një vizite në Husum në bregun gjerman të Detit të Veriut.
Ai tha se do të vazhdojë të përpiqet të balancojë interesat e njerëzve që duan masa më të lira në luftimin e Covid-19 me ato të gjermanëve që kërkojnë më të rrepta.
Prokurorët në Koblenz dhe policia në Rheinland-Pfalz lëshuan një deklaratë të përbashkët në të cilën thanë se katër anëtarët e Vereinte Patrioten të arrestuar kishin “përgatitur sulme shpërthyese dhe akte të tjera dhune”.
Ata thanë se grupi po komplotonte “rrëmbimin e figurave të njohura publike” dhe se qëllimi i tij kryesor ishte “të shkatërronte objektet e furnizimit me energji elektrike në mënyrë që të shkaktonte një ndërprerje të zgjatur mbarëkombëtare që synonte të shkaktonte kushte të ngjashme me luftën civile dhe përfundimisht të përmbyste sistemin demokratik në Gjermani”.
Katër personat e arrestuar ishin anëtarë të të njëjtit grup chat në aplikacionin e mesazheve Telegram. Hetuesit thanë se ata ishin të lidhur me lëvizjen Qytetarët e Rajhut, e cila kundërshton legjitimitetin e kushtetutës gjermane të pasluftës dhe, si rrjedhojë, qeverisë aktuale. Autoritetet thanë se gjithsej 12 persona po hetoheshin.
Discussion about this post