Kryeministri Edi Rama ka deklaruar se emrat potencialë të PS për të zënë vendin e kreut të ri të Republikës do të jenë konfidencialë, në mënyrë që të mos përdoren nga mediat. Në mbledhjen e grupit parlamentar të PS, Rama tha se Presidenti duhet të jetë një figurë pa ngjyrime politike.
“Sot jemi përballë një sfide shumë të madhe. Nuk duam një figurë të ngjyrosur tërësisht politikisht. Ajo që duhet të bëjmë është të bëjmë një sforco të përbashkët duke i hapur rrugë të gjitha detyrimeve të gjithsecilit këtu. Do jetë proces konfidencial. Ne nuk mund të hedhim emra që pastaj bëhen mish përtop për mediat. Ne kemi detyrimin t’ia japim njerëzve mundësinë që të shprehen për këtë temë dhe natyrisht duke përcaktuar disa piketa”, tha Rama.
Më herët, Rama nuk nguroi të sulmojë kreu aktual të Republikës, Ilir Metën duke thënë se në krye duhet të jetë dikush me integritet, ndërsa e konsideroi si Presidentin më skandaloz që kemi pasur.
Discussion about this post