Komisioneri Shtetëror i Zgjedhjeve, Ilirian Celibashi dhe Nënkomisionerja Lealba Pelinku kanë dhënë sot detajet e para në lidhje me hetimet që janë barë për zgjedhjet e 6 marsit. Pelinku bëri me dije se janë evidentuar 47 raste të dyshimta që lidhen me procesin e votimit. Ajo tregoi se në disa raste rezulton se një persona ka votuar në dy qendra votimi të ndryshme.
“Ekzistojnë 47 raste të dyshimta të ndara në tre kategori. Rasti i parë ka të bëjë me identifikimin, pra i njëjti mbajtës i një karte identiteti është paraqitur në dy qendra votimi. Kategoria e dytë lidhet me shenjën e gishtërinjve. Kemi 2 raste kur e njëjta shenjë gishti është lexuar në dy qendra votimi të ndryshme. Një shenjë gishti lidhet me më tepër se sa një dokument identifikimi.
Pra zgjedhësi është paraqitur me një mjet identifikimi dhe më pas rezulton se me një tjetër dokument identifikimi i asociohet e njëjta shenjë gishti. Rasti i tretë lidhet me shenjën e gishtit të skanuar më shumë se një herë në të njëjtën qendër votimi. Pra të njëjtës shenjë gishti i asociohet më shumë se një dokument”, tha ajo. Ndërsa Celibashi tha se pjesëmarrja në zgjedhje ka qenë 30%. Kujtojmë se pak ditë më parë KQZ tha se kanë nisur hetimet për denoncimet që janë bërë ndaj kryebashkiakes Emiriana Sako dhe zyrtarë të Portit të Durrësit.
Discussion about this post