Ditën e sotme zyrtarët ukrainas kanë identifikuar vendndodhjen e varrezave masive jashtë qytetit port të rrethuar ukrainas të Mariupolit, pretendime të forcuara nga publikimi i imazheve satelitore të mbledhura dhe të analizuara prej kompanisë Maxar Technologies.
Në një mesazh të dërguar po ditën e sotme në rrjetin social Telegram, Petro Andriushchenko, një këshilltar i kryetarit të bashkisë së Mariupolit, ka shkruar se në bazë të kërkimeve të bëra në varreza kanë vërtetuar se shumë banorë ishin varrosur në fshatin Manhush.
“Si rezultat i një kërkimi dhe identifikimi të gjatë të varrezave masive të banorëve të vdekur të Mariupolit, ne vërtetuam faktin se shumë banorë të vdekur të Mariupolit ishin varrosur në fshatin Manhush”.
Nga ana tjetër, Andriushchenko i cili nuk është në Mariupol, por ka shërbyer në zyrën për informacion nga brenda qytetit të rrethuar publikoi koordinatat në Telegram, duke thënë se forcat ruse kishin gërmuar disa varre masive, secila me përmasa rreth 30 metra në Manhush, një qytet rreth 19 kilometra në perëndim të Mariupolit.
“Kamionët bartin trupat e të vdekurve, në fakt, thjesht i hodhën në argjinaturë. Kjo është dëshmi e drejtpërdrejtë e krimeve të luftës dhe përpjekjeve për t’i mbuluar ato”.
Ndërkohë, Maxar publikoi analizën e imazheve satelitore të martën që duket se tregon prova të varreve të reja në një vend në skajin veriperëndimor të Manhushit. Vadym Boichenko, kryebashkiaku i Mariupolit, gjithashtu pretendoi të enjten se forcat ruse kanë varrosur trupa në varre masive në Manhush, ku pretendohet se deri në 20 mijë njerëz kanë vdekur gjatë bombardimeve.
“Më shumë se 20 mijë civilë gra, fëmijë, të moshuar vdiqën në rrugët e qytetit tonë nga artileria armike, aeroplanët. Dhe kjo është gjithashtu bazuar në dëshmitë e krerëve të shërbimeve tona komunale, të cilët e panë atë. Dhe për fat të keq, ne kemi parë që trupat e banorëve të vdekur të Mariupolit kanë filluar të zhduken nga rrugët e qytetit tonë”.
Discussion about this post