Gjykata e Lartë ka refuzuar kërkesën për pezullimin e dënimit të ish-prokurorit të përgjithshëm Adriatik Llallës me 2 vite burg. Ish-kryeprokurori bëri këtë kërkesë me arsyetimin se vuan nga një sëmundje e pashërueshme dhe se izolimi do i sillte pasoja të rënda për shëndetin.
Avokat i tij Sokol Hazizaj u shpreh se italianët për shkak të gjendjes shëndetësore e kanë pezulluar ekstradimin, ndërsa kreu i SPAK Arben Kraja tha se gjendja e Llallës nuk e ka penguar të kryejë funksionet e larta, dhe nuk përbën shkak për pezullim.
Hazizaj: Ka një çudi shumë të madhe, sa kohë që Gjykata e Apelit në Itali e ka pranuar gjendjen e tij të rënduar, ndaj edhe nuk e ka pranuar ekstradimin. Unë sot në Gjykatën e Lartë nuk isha për ekstradimin, por për gjendjen shëndetësore, shqetësimin shëndetësor e ka njohur gjykata në Itali. Gjykata e Lartë nuk e njohu referuar edhe pasionit tuaj për ti futur njerëzit në burg, të medias pra.
Kraja: Gjendja shëndetësore e Llallës është e njohur, por nuk është shkak për pezullim. Kjo gjendje ka qenë prej kohësh. Ka kryer funksione të larta dhe nuk është bërë pengesë sëmundja.
Ndërkohë ka një pikëpyetje se çfarë ndodh me ekstradimin e Lallës nga Italia, kërkesë që është bërë 4 muaj më parë, pasi kanë kaluar afatet për ta ekstraduar, por ai ndodhet sërish atje.
Kujtojmë se Ish prokurori i përgjithshëm u shpall fajtor për mosdeklarim dhe fshehje pasurie në 3 episode. Ai akuzohet se nuk ka deklaruar një shumë prej rreth 7 mijë dollarësh për lindjen e djalit, shpenzimet që lidhen me ndërtimin e katit të tretë të një banese si dhe të ardhurat për shkollimin e vajzës në Gjermani.
Discussion about this post