Afera e inceneratorit të Fierit/ Kryemadhi: Në burg me Bllakon duhet të shkojë edhe Subashi

Drejtuesja e Lëvizjes Socialiste për Integrim, Monika Kryemadhi është shprehur se sa i përket aferës së inceneratorit të Fierit, në burg duhej të ishte edhe kryebashkiaku Armando Subashi.

“Pse them që SPAK-u është në provë? A po themi luftë kundër korrupsionit? Lufta kundër korrupsionit nuk bëhet selektive. Lufta kundër korrupsionit bëhet ballore. Sepse po e bërë selective e rrit korrupsionin më shumë. Sepse  vdes atë qelizë që po pretendon se mund te ngrihet. Mua më ka dhënë një fije shprese SPAK-u. Po nëse SPAK-u nxjerr një njoftim për inceneratorin e Fierit ku thotë se në lidhje me shpronësimin e pronës për inceneratorin e Fierit ka shpërdorim detyre, arrestohet Alqi Bllako, personi që ka paguar paratë është Armando Subashi, i cili ka një vendim.Armando Subashi nuk është budalla, Armando Subashi ka qenë gjyqtar. Dhe Armando Subashi e di shumë që një veprim i tillë, nuk mund të paguajë, pra vepra e Armando Subashit është aty. Armando Subashi nuk duhet ta paguante sepse e ka konstatuar që ajo është tokë arë. Nëse çështja e inceneratorëve mendohet që është Alqi Bllako dhe Lefter Koka çështja e inceneratorëve ka rënë”, është shprehur Kryemadhi.

E ftuar në “Pikat mbi i”, Kryemadhi ka thënë se koka e inceneratorëve është Edi Rama dhe pas tij vjen piramida Engjëll Agaçi, Damian Gjiknuri,Arben Ahmetaj. Ajo ka thënë se Erion Veliaj është kryesori që ka “marrë llokmën më të madhe” dhe angazhim financiar 3 vjeçar. Prandaj SPAK-u është në provë, as të mos intimidohet.