Kryeministri i Ukrainës Denys Shmyhal e ka quajtur situatën në Mariupol “katastrofën më të madhe humanitare” që nga pushtimi i Rusisë dhe ndoshta katastrofa më e keqe e shekullit, pasi qyteti port po përballet me bombardime të vazhdueshme nga forcat ushtarake ruse.
Duke folur në një konferencë shtypi në Uashington të premten, Shmyhal tha se mijëra njerëz kishin vdekur në Mariupol, duke shtuar: “Ne do të shohim mizoritë e tmerrshme kur do të çlirohet nga rusët”.
Ai tha se trupat ruse po “shkatërrojnë absolutisht gjithçka”, duke përfshirë strehimoret ku po qëndrojnë civilët.
Rreth 100 mijë njerëz mbeten të bllokuar në Mariupol që kur u rrethua nga forcat e ushtrisë ruse më 1 mars, sipas zyrtarëve ukrainas. Ata pretendojnë se më shumë se 20 mijë njerëz në qytet kanë vdekur gjatë sulmit.
CNN nuk mund t’i identifikojë në mënyrë të pavarur këto shifra, pasi një numër i saktë i vdekjeve pas javëve të bombardimeve të rënda nuk është i disponueshëm.
Të premten, Shmyhal tha se civilët duke përfshirë gra dhe fëmijë fshihen në fabrikën e çelikut Azovstal, qendresa e fundit e mbrojtësve ukrainas brenda qytetit. Ai tha se ushtria ruse është ende duke rrethuar zonën dhe Ukraina po flet me partnerët për të negociuar një korridor evakuimi.
Ai u bëri thirrje gjithashtu ambasadorëve nga të gjitha vendet, përfshirë Shtetet e Bashkuara të Amerikës, të kthehen në ambasadat e tyre në Kiev.
Discussion about this post