Gjykata Kushtetuese ka zbardhur vendimin përmes të cilit rrëzoi kërkesën e Partisë Demokratike për ngritjen e Komisionit Hetimor për çështjen “Becchetti”. Në vendimin ku listohen argumentet, Gjykata thekson se kërkesa për ngritjen e komisionit hetimor e depozituar në Kuvend është nënshkruar nga 31 deputetë numër ky që nuk plotëson kuotën e kërkuar nga Kushtetuta.
“Kërkuesi nuk legjitimohet t’i drejtohet Gjykatës për arsye se 5 nga 36 deputetët që kanë nënshkruar kërkesën e paraqitur në Gjykatë për inicimin e këtij gjykimi kushtetues nuk e kanë nënshkruar kërkesën për ngritjen e komisionit hetimor. Pra, vetëm 31 nga 39 deputetët që kanë kërkuar ngritjen e komisionit hetimor e kanë nënshkruar kërkesën për t’iu drejtuar Gjykatës. Kushtetuta i njeh një të katërtës së deputetëve (35 deputetë) të drejtën për të kërkuar ngritjen e komisioneve hetimore parlamentare, ndaj vetëm kjo pakicë parlamentare (të njëjtët deputetë) legjitimohet t’i drejtohet Gjykatës për cenimin e kësaj të drejte. Ndërsa një e pesta e deputetëve të Kuvendit, sipas qëndrimit të mbajtur nga Gjykata në vendimin nr. 20, datë 04.05.2007, nuk mund t’i drejtohet asaj në rastet e mosmarrëveshjeve të kompetencave që lindin nga vendimmarrja e Kuvendit për komisionet hetimore, pasi vetëm një e katërta, pra 35 deputetë mund t’i drejtohen Gjykatës në këto raste”, shprehet gjykata.
Kështu, gjykata vendosi rrëzimin e kërkesës së PD. Sipas njoftimit, votuan për legjitimimin e kërkuesit gjyqtarët Marsida Xhaferllari, Përparim Kalo dhe Sonila Bejtja, ndërsa kundër ishin Vitore Tusha, Elsa Toska, Altin Binaj dhe Fiona Papajorgji.
Discussion about this post