Edhe pse është denoncuar disa herë nga mediat, kryetari i Bashkisë së Tropojës vijon që të bëjë tendera për kushërinjtë e tij. Në datën 25 Mars 2022, Bashkia e Tropojës ka hapur një tender për rikonstruksionin e rrugës Blini i Grisë-Lekurtaj. Procedura mban numrin e referencës REF-23089-03-25-2022 dhe ka fondin limit prej 10.986.652 lekë të reja ose rreth 110 milionë lekë të vjetra. Tenderi është zhvilluar me vetëm një konkurrent dhe pjesëmarrës ka qenë bashkimi i kompanive, “Vllaznimi” shpk & “Griald” shpk.
Siç e kemi thënë edhe më parë, tenderët që zhvillohen pa garë ngrenë dyshime se kompania fituese mund të jetë e paracaktuar dhe për këtë “Open Data” e ka futur në kategorinë e flamurit të kuq me mbishkrimin e mungesës së konkurrencës. Por në këtë procedurë nuk ka vend për dyshime, pasi kompania fituese “Vllaznimi” SHPK është e kushëririt të kryetarit të Bashkisë së Tropojës, Bashkim Byberit. Pra, procedura jo vetëm që është zhvilluar pa garë, por është edhe në konflikt të pastër interesi.
Kjo nuk është hera e parë që kryebashkiaku i Tropojës, Rexh Byberi, i jep tender kompanisë së kushëririt të tij. “Vllaznimi” SHPK e Bashkim Byberit ka marrë nga Bashkia e Tropojës tendera edhe më parë.
Kujtojmë se më 5 nëntor të 2020-ës, kryebashkiaku socialist rezulton se ka vepruar në konflikt interesi për firmën fituese Vllaznimi shpk për “Rikonstruksion i kanalit vaditës Ahmataj-Sopot. Ky prokurim me tender në vlerën rreth 19 milionë lekë pa TVSH, u realizua në nëntor dhe është shpallur fitues Vllaznimi shpk që ka për pronar të vetëm, si dhe njëherësh administrator, Bashkim Byberin.
Një tjetër tender kryebashkiaku i Tropojësi ia ka dhënë kushëririt të tij, pra kompanisë “Vllaznimi shpk” është për rikonstruksionin e Ujësjellësit Dushaj Epërm. Oferta e paraqitur, me një vlerë të përgjithshme ishte rreth 12 milionë lekë të vjetra.
Rexh Byberi nuk është mjaftuar me kaq, pasi i ka dhënë edhe një super tendër kushëririt të tij. Bashkia Tropojë më 6.10.2020 ka hapur një procedurë prokurimi me vlerë 3.5 miliardë lekë pa TVSH për ikonstruksionin e 5 segmenteve rrugore fshati që duhet të likuidohen për tre vitet e ardhshme me ndihmën e buxhetit në një kohë kur e gjithë shuma në dispozicion është shumë më e vogël. Konkretisht bëhet fjalë për prokurimin publik në vlerën e 340.421.901 lekëve të reja ose rreth 3.4 miliardë lekë të vjetra për rikonstruksionin e 5 segmenteve Rrugore fshati Gri, Bujan, Cerrnice, Tropoje. Edhe në klëtë tender, fitues ishte bashkimi i këtyre firmave, që kryesohet nga Vllaznimi shpk, e cila zotërohet nga djali i xhaxhait të kryebashkiakut socialist.
Bashkia Tropojë nën drejtimin e Byberit, gjithashtu është përfshirë edhe në raportet e KLSH-së. Në muajin shkurt 2022, raporti konfirmonte Bashkinë e Tropojës si një nga njësitë vendore më të korruptuara në Shqipëri. 98 % e parave të shpenzuara për shërbime të ndryshme, janë ndarë dhe kanalizuar në mënyrë të paligjshme dhe korruptive. Kujtojmë se kryebashkiaku i Tropojës në 30 mars 2021 është marrë nën hetim nga SPAK, me akuzan e shpërdorimit të detyrës. Por siç duket as hetimi i SPAK nuk e ndal kryebashkiakun e Tropojës që të bëjë tendera në shkelje të ligjit.
Gijotina.com
Discussion about this post