Ministria e Drejtësisë ka zhvilluar ditën e sotme një tryezë mbi procesin e integrimit me pjesëmarrjen e përfaqësuesve të ndryshëm të agjensive ligjzbatuese në vend.
Në fjalën e mbajtur në takim, ministri i Drejtësisë Ulsi Manja deklaroi se me hapjen e negociatave do të intensifikohen marrëdhëniet me Bashkimin Europian dhe kërkoi që institucionet ligjzbatues të bashkëpunojnë së bashku për plotësimin e Kapitullit 23 dhe kriterit politik.
Manja deklaroi gjithashtu se pas hapjes së negociatave sytë vëzhgues të BE-së ndaj Shqipërisë do të rriten dhe për këtë kërkoi nga institucionet përgjegjëse për Kapitullin 23 të funksionojnë si sahat për plotësimin e kushteve.
“Takimin e sotëm unë e konsideroj si një shprehje të vullnetit tuaj për të vijuar axhendën e integrimit. Mbajtja e kësaj tryeze vjen pas një lajmi të mirë që vjen nga Franca, pas rizgjedhjes së presidentit Macron, dhe rolit të avancues për proceset integruese në Ballkanin Perëndimor.
Takimi i sotëm i dedikohet pikërisht këtij intensifikimi të marrëdhënieve me instituicionet që garantojnë sundimin e ligjit. Gjatë viteve të fundit të gjithë kemi qenë dëshmitarë të një tejzgjatjeje për hapjen e negociatave megjithëse rekomandimet e Komisionit Europian kanë qenë pozitive.
Përpjekje të shumanëshme po bëhen që ky proces të ndodhë këtë vit. Me hapjen e negociatave komunikimi me strukturat e BE-së do të intensifikohet dhe çdo punë do të shumëfishohet, por dhe kërkesat për të treguar progres do të intensifikohen, sytë vëzhgues do të rriten dhe kërkesat do të ashpërsohen, prandaj të dashur miq ne duhet të funksionojmë si sahat. Kjo duhet të jetë deviza jonë deri në integrimin e plotë të Shqipërisë në Bashkimin Europian. Sikurse jeni dhe në dijeni procesit të negociatave i kemi kërkuar një vëmendje të shtuar në Ministrinë e Drejtësisë me ngritjen e drejtorisë së integrimit e cila është e plotësuar dhe me staf. Kapitulli 23 dhe kriteri politik janë në krye të punës tonë çdo ditë”, tha Manja.
Discussion about this post