Ish-ministri i Jashtëm, Besnik Mustafaj, ka komentuar sot gjatë një interviste televizive nismën e disa qytetarëve për një peticion online kundër ambasadores Yuri Kim, të cilën më pas pritet ta dërgojnë në DASH. Për Mustafajn kjo është një nismë e nxituar, pasi ambasadorja Yuri Kim përfaqëson SHBA-të në vendin tonë dhe nuk është mirë që të prishen marrëdhëniet. Ai theksoi se kjo që po ndodh në Shqipëri nuk ka ndodhur në asnjë vend tjetër të botës.
“Për mua është rruga e papërshtatshme për t’i përcjellë DASH pakënaqësinë e një grupi njerëzish. Ata që marrin nisma të tilla harrojnë që ambasadorja përfaqëson vendin e saj. Unë nuk di vende të tjera të kenë bërë këtë rrugë, për ndonjë ambasadorë amerikanë. Nuk e di, kam parë që figura nga PD apo opozita kanë thënë se nuk do ta mbështesin një nismë të tillë. Ambasada amerikane, SHBA dhe BE janë nxitësit dhe mbështetësit e Reformës në Drejtësi, pra nuk është hera e parë e ndërhyrjes së ambasadores Kim. Nuk vlen më të merremi me komentet se çfarë bën ambasadorja. Për mua kritikat duhet të merren ndaj gjyqtares jo ndaj ambasadores”, tha ai.
Sipas Mustafajt Berisha nuk bën mirë që përplaset me ambasadoren amerikane, pasi ajo përfaqëson SHBA-të në vendin tonë. Ai theksoi se nëse Berisha përplaset me ambasadoren, përplaset dhe me DASH.
“Unë vazhdoj të jem i mendimit që Berisha nuk bën mirë që përplaset më Kim dhe DASH. Unë e kam thënë që ambasadorja amerikane përfaqëson DASH. Nuk ka asnjë të vërtetë në thashethemet se Kim jep mendimet e veta. Nëse Berisha përplaset me ambasadoren, përplaset dhe me DASH. Berisha duhet të ruaj profilin e pretendentit për kryetar të PD, ish-kryetarit të PD dhe ish-presidentit. Kundërshtari i tij është Rama jo ambasada amerikane. Çështjet me DASH Berisha i ka bërë që në fillim”, tha ai.
Discussion about this post